Job 9

Impendulo KaJobe

1Wasephendula uJobe wathi:

2“Ngeqiniso ngiyazi ukuthi lokhu kuliqiniso.
Kodwa umuntu wenyama angalunga yini kuNkulunkulu?
3Loba umuntu ubengafisa ukuphikisana laye
ngeke amphendule lakanye emibuzweni eyinkulungwane.
4Ukuhlakanipha kwakhe kujulile, amandla akhe makhulu.
Ngubani kambe oke wamelana laye wasinda?
5Uyazidudula izintaba zona zingazi lutho,
azigenqule nxa esezondile.
6Uyawunyikinya umhlaba endaweni yawo,
axukuxe izinsika zawo.
7Uyalitshela ilanga ukuba lingakhanyi;
asibekele ukukhanya kwezinkanyezi.
8Nguye kuphela owelula amazulu,
ohamba phezu kwamagagasi olwandle.
9UnguMenzi wezinkanyezi iNgulube leZinja,
iSilimela lomthala waseningizimu.
10Wenza imimangaliso engafinyelelekiyo,
izimanga ezingelakubalwa.
11Uthi nxa esedlula kimi, ngingamboni;
ahambe khonapho ngingezwa lutho.
12Nxa ehluthuna, ngubani ongamalela?
Ngubani ongathi kuye, ‘Wenzani wena?’
13UNkulunkulu kalunqandi ulaka lwakhe;
labasekeli bakaRahabi besaba bawela ezinyaweni zakhe.

14Pho mina ngingaphikisana laye njani?
Ngingawathatha ngaphi amazwi okujijana laye?
15Laloba ngingelamlandu, ngeke ngimphendule;
ngingancenga uMahluleli wami kuphela ukuthi angihawukele.
16Lanxa bengingambiza asabele,
angikholwa ukuthi ubengangilalela.
17Ubengangicobodisa ngesiphepho
andise amanxeba ami kungelasizatho.
18Ubengasoze angiphe ithuba lokukhokha umoya
kodwa ubezahle angincindezele ngosizi.
19Nxa kungokwamandla, alamandla amakhulu!
Nxa kungokokwahlulela ngokulunga, ngubani ongamthonisisa?
20Loba ngingabe ngimsulwa, umlomo wami ubungangilahla;
lanxa ngimsulwa wona ubuzakuthi ngilecala.

21Lanxa ngingelacala,
angizihluphi ngami;
ngiyayeyisa impilo yami.
22Kuyafanana konke; yikho ngisithi,
‘Ubhubhisa bonke abangelacala lababi.’
23Nxa isifo esibi sibulala ngokuphangisa,
uyabahleka abangelacala ngokulahla kwabo ithemba.
24Nxa ilizwe liwela ezandleni zababi,
wembesa amehlo abahluleli balo.
Nxa kungayisuye, pho ngubani?

25Amalanga ami alesiqubu esidlula esesithunywa;
ayaphapha anyamalale kungela mthonselanyana wokuthokoza.
26Antweza edlule njengezikepe zelala,
njengenkozi zisehla zihwitha ezikudlayo.
27Nxa ngingathi, ‘Ngizakubeka eceleni ukusola kwami,
ngicitshe ukunyukubala kwami, ngibobotheke,’
28ngilokhu ngihemahema ngezinhlupho zami,
ngoba ngiyazi ukuthi kawuzukungigeza.
29Njengoba ngivele sengibekwe icala,
ngizazihluphelani ngokulwela ize na?
30Loba ngingaze ngigeze ngesepa
lezandla zami ngesoda yokuhlambulula,
31uzavele ungiphosele emgodini olodaka
ngize ngenyanywe yizigqoko zami.

32Akasumuntu njengami ukuthi ngingamphendula,
ukuthi singamisana emthethwandaba.
33Aluba ubengabakhona osilamulayo,
abeke isandla sakhe phezu kwethu sobabili,
34omunye nje ongasusa uswazi lukaNkulunkulu kimi,
ukuze ngingatshukunyiswa yikwesaba lokhu.
35Lapho-ke bengizakhuluma ngingesabi yena,
kodwa okwakhathesi kunje, ngeke.”